Bankarán í gamla Vesturbænum og spádómar um líf og dauða

Í þessum fimmta þætti Þráða förum við yfir sögu bankarána á Íslandi. Við einblínum á fyrsta vopnaða bankaránið hér á landi, í Búnaðarbankanum í Vesturgötu í desembermánuði árið 1995. Við ræðum við Eyjólf Einarsson, listmálara, sem varð vitni að ráninu og hringdi á lögregluna, og Margréti Valdimarsdóttur, doktor í afbrotafræði, sem setti bankaránin í sögulegt og félagslegt samhengi. Þá hlustar Jón Hallur Stefánsson, þýðandi, aftur á nærri aldarfjórðungs gamla upptöku þar sem spáð var fyrir honum af tveimur spákonum í þættinum Vinkli árið 1998. Umsjón: Atli Már Steinarsson og Ingvar Þór Björnsson

Om Podcasten

Atli Már Steinarsson og Ingvar Þór Björnsson stjórna tímaferðalagi sem takmarkast ekki við neitt nema forvitni og hvort gamlar spólur séu orðnar of snjáðar til að hægt sé að spila þær aftur. Er hægt að taka upp eldgamlan þráð og vinna sig aftur til nútíðar? Geta hlutirnir sem við sögðum einu sinni, kennt okkur eitthvað í dag? Kannski. En svo getur líka bara verið gaman að hlusta á gamlar sögur, skoðanir og hlæja að því hvernig allt var einu sinni. Hvort sem við missum þráðinn eða ekki. Umsjónarmenn: Atli Már Steinarsson og Ingvar Þór Björnsson.